မရဲတရဲနဲ့ ရေးကြည့်လိုက်တာပါ(လူထုစိန်ဝင်း)

ဖေဖော်ဝါရီ ၂၂ ရက်နေ့က ရန်ကုန်တိုင်း ဒေသကြီး ပြည်သူ့ လွှတ်တော်မှာ ပြည်သူ့လွှတ်တော် ဥပဒေရေးရာနှင့် အထူးကိစ္စရပ်များ လေ့လာဆန်းစစ်သုံးသပ်ရေး ကော်မရှင်နဲ့ ပြည်သူ့လွှတ် တော်ဥက္ကဌ သူရဦးရွှေမန်းတို့ တွေ့ဆုံခဲ့ကြတယ်။ အဲဒီလိုတွေ့ရာမှာ ပြည်သူ့လွှတ်တော်ဥက္ကဌက ၀န်ထမ်းတွေ လစာတိုးပေးရေးနဲ့ ပတ်သက်တဲ့ အဆို ပြည်သူ့လွှတ်တော်မှာ ဘာကြောင့်တင်ခဲ့သလဲဆိုတာကို အကျယ်တ၀င့် ရှင်းလင်းပြောကြားသွားခဲ့တယ်။

သတ္တိရှိစေချင်တယ်

အဲဒီပြောသွားတဲ့အထဲမှာ အပြည့်အ၀သဘောတူတာ တခုတွေ့ရတယ်။ အဲဒါကတော့ “ကျနော်က ဒီလိုပြောပေမယ့် သတင်းထဲကျတော့ ရဲရဲဝံ့ဝံ့ဆိုတာပါပြီး သတ္တိရှိရှိဆိုတဲ့ စကားကျတော့ ပါမလာဘူး။ သဘောကတော့ ဒီစကားကို ကျနော်သုံးလိုက်တာကို သတင်းစာထဲ၊ ရေဒီယိုထဲ၊ တီဗီထဲကို ထည့်လိုက်တယ်ဆိုရင် ကျနော့်အတွက်များ စိုးရိမ်ပြီးတော့ မထည့်တာလားတော့ မသိဘူး။ သတ္တိလို့ ဘာလို့ထည့်လိုက်လဲ ဆိုတဲ့အခါမှာ ကျနော်ကတော့ သတ္တိရှိချင်တယ်။

ဒါဖြင့်ရင် ကျနော်တယောက်တည်းပဲ သတ္တိရှိချင်တာလား ဆိုတော့ ကျနော်တို့ နိုင်ငံသားလူမျိုးအားလုံးကို ရှိစေချင်တယ်။ မိုက်မဲခြင်းနဲ့ မယှဉ်သော တာဝန်ကျေမှုကို အားလုံးမှာရှိစေချင်တယ်။ အခုချိန်မှာရော၊ အရင်တုန်းကရော ကျနော်တို့တွေ သတ္တိရှိကြလားဆိုတဲ့နေရာမှာ ရှိတဲ့လူတွေလည်း ရှိမှာပေါ့၊ တချို့မရှိတဲ့ သူတွေလည်း ရှိကြမှာပေါ့။

မရှိရတဲ့အကြောင်းရင်းက ဘာလဲဆိုတော့ ကိုယ့်အတ္တအ ကျိုးစီးပွားကို ကြည့်ပြီးတော့ မပြောရဲတာတို့၊ ပြောလိုက်ရင် ငါ့ကို ဒုက္ခရောက်စေမှာလို့၊ အဲဒီလိုဖြစ်လာတဲ့အခါကျတော့ မှန်တာလည်း မပြောရဲ၊ ကောင်းတာလည်း မပြောရဲဆိုတဲ့ အနေအထားတွေက ဒီအတိုင်းဆက်သွားမယ်ဆိုရင် ကျနော်တို့နိုင်ငံ နိမ့်ကျနောက်ကျနေတဲ့ အနေအထားမှာပဲ ဖြစ်နေလိမ့်မယ်” လို့ ဖြစ်တယ်။

မရဲတရဲဆုံးဖြတ်

လွှတ်တော်ဥက္ကဌရဲ့ မိန့်ခွန်းအပြည့်အစုံကို ဖတ်ပြီးတဲ့အခါကျတော့ ဒီစာကို ရေးလိုက်တော့မယ်လို့ မရဲတရဲ ဆုံးဖြတ်ချက်ချပြီး ရေးလိုက်တာဖြစ်တယ်။ မရဲတရဲဆိုတာက ကိုယ့်အတွက် စိုးရိမ်လို့မဟုတ်ဘူး၊ ဒီစာ စာဖတ်ပရိသတ်ဖတ်ရတဲ့ အဆင့်ကို မရောက်မီ ဇီဝိန်ချုပ်သွားမယ့်အရေး စိုးရိမ်တာဖြစ်တယ်။ ဘာကြောင့်လဲဆိုတော့ စာပေစိစစ်ရေးတို့၊ ပြန်ကြားရေးဝန်ကြီးဌာနတို့နဲ့ တည့်တည့်ကြီးဝင်တိုးတဲ့ ကိစ္စဖြစ်နေလို့ပဲ။

ဒီကိစ္စကို အစောကြီးကတည်းက ရေးချင်နေတာ။ ဒါပေမယ့် လွတ်မှာမဟုတ်ပါဘူးလေ ဆိုတဲ့အတွေးက အလေးသာနေလို့ မရေးဖြစ်ဘူး။ အခုလည်း မလွတ်လည်းရေးခဲ့တယ်ဆိုတဲ့ သက်သေအထောက်အထားတော့ ကျန်ခဲ့မှာပဲ၊ သမိုင်းတရားခံတော့ မဖြစ်တော့ဘူးပေါ့လို့ တွေးပြီး ရေးလိုက်တာဖြစ်တယ်။ စိစစ်ရေးနဲ့ မလွတ်လို့ ဂျာနယ်ထဲမပါလည်း Facebook တင်လိုက်ရင် ဖတ်ကြရမှာပါပဲ။

ပြည်သူ့ရှေ့မှောက်မှ ကွယ်ပျောက်သွားရေး

ကိစ္စကတော့ မီဒီယာဥပဒေဆိုတဲ့ ကိစ္စပါ။ ဖေဖော်ဝါရီ ၁၇ ရက်နေ့က ပြည်သူ့လွှတ်တော် အစည်းအဝေးမှာ ရွှေပြည်သာမဲဆန္ဒနယ်က ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (ကြံ့ခိုင်ရေးပါတီ) ကိုယ်စားလှယ် ဦးတင်မောင်ဦးက “နိုင်ငံတော်ရဲ့ စတုတ္တမဏ္ဍိုင်ဖြစ်တဲ့ မီဒီယာကဏ္ဍမှ ဂျာနယ်လောကတွင် တဖက်သတ်ဘက်လိုက် အရေးအသားများ ပြည်သူ့ရှေ့မှောက်မှ ပျောက်ကွယ်သွားရေး၊ ပြည်သူ့လိုအင် ဆန္ဒ အမှန်အမှားကို သမာသမတ်ကျကျ သိက္ခာရှိရှိ မျှတစွာရေးသားထုတ်ဝေသော တိုင်းကျိုးပြည်ပြု ဂျာနယ်များ ထွက်ပေါ်လာရေး၊ ၀ါသနာအရင်းခံပြီး ၀င်ရောက်လုပ်ကိုင်သော ယုံကြည်ချက် ခံယူချက်ရှိသည့်သူများ စိတ်အေးချမ်းသာစွာ သင့်တင့်သော အရင်းအနှီးဖြင့် ဂျာနယ်များ ထုတ်ဝေရပ်တည်နိုင်ရေးအတွက် စည်းကမ်းမဲ့ငွေရှာ၊ စီးပွားရှာသူများ လျော့နည်းပပျောက်လာရေးနဲ့ ဂျာနယ်လောကမှ လူငယ်သတင်းထောက်များ ယခုထက် ပိုမိုအရည်အသွေးမြင့်မားလာရေးတို့အတွက် မည်သို့သော အကာအကွယ်ပေး ဆောင်ရွက်နိုင်မည်ကို သိရှိလိုပါတယ်” လို့ မေးသွားခဲ့တယ်။

ဆက်လက်ထိန်းကျောင်းသွားမည်

ပြန်ကြားရေးဝန်ကြီးဌာန ပြည်ထောင်စု ဒုတိယ၀န်ကြီး ဦးစိုးဝင်းက “မီဒီယာကဏ္ဍမှ ဂျာနယ်လောကတွင် တဖက်သတ်လိုက် ရေးသားသော အရေးအသားများ ပြည်သူ့ရှေ့မှ ကွယ်ပျောက်သွားရေးအတွက် ယခု နိုင်ငံတော် အစိုးရအဖွဲ့သစ် စတင် တာဝန်ယူချိန်မှစ ပြန်ကြားရေးဝန်ကြီးဌာနက လွတ်လပ်မှုနှင့် တာဝန်ယူမှုရှိသော၊ လွတ်လပ်မှုနှင့် ဆင်ခြင်တုံတရားရှိသော စာပေနှင့်စာနယ်ဇင်း သမားများ ဖြစ်လာစေရန်၊ တာဝန်သိမှု၊ တာဝန်ယူမှုတို့ဖြင့် ဆောင်ရွက်ကြရန်၊ စာပေစိစစ်ရေးမူများ သတ်မှတ်စစ်ဆေးကြပ်မတ်လျက်ရှိကြောင်း၊ အနာဂတ်တွင် ပုံနှိပ်ဥပဒေနှင့်အညီ ပေါ်ပေါက်လာမည့် Press Council ကဲ့သို့ အဖွဲ့အစည်းမျိုးဖြင့် ဆက်လက် ထိန်းကျောင်းသွားမည် ဖြစ်ပါတယ်” လို့ ပြန်လည်ဖြေကြားသွားခဲ့ပါတယ်။

သတင်းသမားစစ်စစ် ဟုတ်ရဲ့လား

ဒီအမေးနဲ့ ဒီအဖြေကို ကြည့်ခြင်းအားဖြင့် မကြာခင်အတွင်း မီဒီယာဥပဒေဆိုတာ တခုပေါ်ပေါက်လာဖို့ရှိကြောင်း သိနိုင်တယ်။ အဲဒီမတိုင်ခင်ကလည်း မီဒီယာဥပဒေ ရေးဆွဲရေးနဲ့ပတ်သက်ပြီး ပြည်တွင်းပြည်ပ သတင်းမီဒီယာ သမားတွေ ပါဝင်တက်ရောက် ဆွေးနွေးတဲ့ ဆွေးနွေးပွဲတွေ ကျင်းပခဲ့ကြတယ်။ ပြည်ပ သတင်းမီဒီယာသမား အမည်ခံတချို့က မီဒီယာဥပဒေအတွက် အကြံပေးချက်တွေ တင်ပြကြတာလည်း တွေ့ရတယ်။

မီဒီယာကို ချုပ်ကိုင်ဖို့ ရေးဆွဲတဲ့ ဥပေဒကို မီဒီယာသမားတွေကိုယ်တိုင် ပါဝင်ဆွေးနွေး အကြံပေးကြတယ်ဆိုတော့ တော်တော်အံ့သြမိတယ်။ သတင်းမီဒီယာသမား စစ်စစ်တွေမှ ဟုတ်ရဲ့လားလို့လည်း အတွေးရောက်မိတယ်။ ကိုယ့်လည်ပင်းကို စွပ်မယ့်ကြိုးကွင်းကို ကိုယ်တိုင် ၀င်ကျစ်ပေးတာနဲ့ မတူဘူးလား။

ဥပဒေဆိုတာ ချုပ်ကိုင်ဖို့

ဥပဒေဆိုတာ ဘယ်ဥပဒေပဲဖြစ်ဖြစ်၊ တိုင်းသူပြည်သားများကို ချုပ်ကိုင်ဖို့ ချမှတ်တာဖြစ်တယ်။ ဒီမိုကရေစီရဲ့ အနှစ်သာရက လူတွေကို တုပ်နှောင်ထားတဲ့ နှောင်ကြိုးအားလုံးက လွတ်ကင်းရေးဖြစ်တယ်။ သတင်းသမား မှန်ရင် ဘယ်လိုချုပ်ပိုင်မှုမျိုးကိုမဆို ဆန့်ကျင်ရမယ်။ စစ်မှန်တဲ့ ဒီမိုကရေစီဖြစ်ဖို့အတွက် မလိုလားအပ်တဲ့ ပြည်သူလူထုကို နှောင်ကြိုးတည်းတဲ့ ဥပေဒတွေကို ပယ်ဖျက်ပြီး မရှိမဖြစ်ထားဖို့ လိုအပ်တဲ့ ဥပဒေတွေကိုသာ ထားရှိကျင့်သုံးရမှာ ဖြစ်တယ်။

သတင်းမီဒီယာကို ထိန်းချုပ်တဲ့ ဥပဒေ၊ ပုဒ်မတွေ အခုကို မနည်းလှပါဘူး။ တချို့က မလှုပ်သာမယှက်သာအောင် တင်းကျပ်လွန်းလို့ ဖြေလျှော့သင့်ပြီး တချို့ကျတော့ ဒီမိုကရေစီရဲ့ အနှစ်သာရနဲ့ ဆန့်ကျင်ဘက်ဖြစ်နေလို့ လုံးဝ ဖျက်သိမ်းပစ်သင့်တယ်။

ကြိုက်သလိုချဲ့ကားလို့ရ ခေတ်အဆက်ဆက် သတင်းသမားတွေ အများဆုံးရင်ဆိုင်ရတဲ့ အသရေဖျက်မှု ဥပဒေ၊ အစိုးရကို အကြည်ညို ပျက်စေမှု ဥပဒေ၊ ဆူပူမှုဖြစ်အောင် လှုံ့ဆော်မှုဥပဒေ၊ အခုခေတ်ပေါ် အီလက်ထရောနစ်ဥပဒေ ဆိုတာတွေက ပုံကြီးချဲ့ချင်ရင် ကြိုက်သလို ချဲ့ကားပြီး အမှုလုပ်လို့ရပါတယ်။ လက်ဖက်ရည်ဆိုင်မှာ သူငယ်ချင်းနှစ်ယောက် စားဝတ်နေရေး ကြပ်တည်းကြောင်း၊ ဘာတခုမှ ကောင်းတာမတွေ့ရကြောင်း၊ ချမ်းသာသူတွေကတော့ သန်းထောင်ချီပြီး ချမ်းသာနေကြကြောင်း၊ ပြောရိုးပြောစဉ် နှစ်ကိုယ်ကြား ပြောဆိုနေမိကြတာ ကို ဘေးစားပွဲမှာရှိတဲ့ လူတယောက်က အစိုးရဆန့်ကျင်ရေးတွေ ပြောနေတာ ကြားခဲ့ကြောင်း သွားပြီး တိုင်ကြားလိုက်ရင် ချက်ချင်းဖမ်းချုပ်ပြီး စစ်ဆေးခံရတယ်။

ပုံကြီးချဲ့ပြီး အစိုးရအကြည်ပျက်စေမယ့် စကားတွေပြောတယ်၊ ဘေးကလူတွေ ကြားနိုင်တဲ့အတွက် ဆူပူအောင်လှုံ့ဆော်ပါတယ်လို့ စွဲချက်တင်နိုင်တယ်။ မိတ်ဆွေချင်း အီးမေးလ်နဲ့ စာပို့ပြီး ညည်းမိတာကိုလည်း အီလက်ထရောနစ် ပုဒ်မတပ်ပြီး ဖမ်းနိုင်တယ်။

လွတ်လပ်ရေးစိတ်ကို ချိုးနှိမ်ဖိသတ်ဖို့

လက်ရှိကျင့်သုံးနေတဲ့ မှုခင်းဆိုင်ရာ၊ တရားမဆိုင်ရာ ဥပဒေတွေ အားလုံးလောက်နီးပါးက ကိုလိုနီ အစိုးရခေတ်က တိုင်းသူပြည်သားများရဲ့ လွတ်လပ်ရေးစိတ်ဓာတ်ကို ချိုးနှိမ်ဖိသတ်ဖို့ ရေးဆွဲ ချမှတ်ခဲ့ကြတာတွေ ဖြစ်တယ်။ ပြည်သူလူထုကို ကာကွယ်စောင့်ရှောက်ဖို့ ရေးခဲ့တာ မဟုတ်ပါဘူး။ ဒါကြောင့် အခုအချိန်မှာ အဲဒီလို ဖိနှိပ်ချုပ်ချယ်ရေး လက်နက်သက်သက်ဖြစ်နေတဲ့ ဥပဒေ ပုဒ်မတွေကို ရုပ်သိမ်းဖို့၊ လျှော့ချဖို့ အားလုံးဝိုင်းဝန်း ကြိုးစားရမှာ ဖြစ်ပါတယ်။ ဒီလိုအချိန်မျိုးမှာ သတင်းမီဒီယာတွေကို ချုပ်ကိုင်ဖို့ရည်ရွယ်တဲ့ မီဒီယာဥပဒေမျိုး သွတ်သွင်းမလာသင့်ပါဘူး။ နှစ်ပေါင်းငါးဆယ်ကျော် သတင်းသမား လုပ်လာသူတယောက်အနေနဲ့ သတင်း မီဒီယာကို ချုပ်ကိုင်မယ့် ဘယ်လို အစီအမံမျိုးမဆို ဆန့်ကျင် ကန့်ကွက်ပါတယ်။

လက်ခံနိုင်မှာမဟုတ်

သတင်းသမားတို့ လိုက်နာရမယ့် ကျင့်ဝတ်စည်းကမ်းတွေ ဆိုတာလည်း သတင်းသမားတွေ ကိုယ်တိုင် ဆွေးနွေးတိုင်ပင်ရေးဆွဲရမှာ ဖြစ်တယ်။ ဆရာဝန်တွေအတွက် ကျင့်ဝတ်ကို ဆရာဝန် မဟုတ်သူတွေကို ရေးခိုင်းလို့မဖြစ်ပါဘူး။ ဆရာဝန်တွေ ကိုယ်တိုင်ရေးမှ အဓိပ္ပာယ်ရှိပါတယ်။ အဲဒါကြောင့် လုံးဝလွတ်လပ်တဲ့ သတင်းစာဆရာအသင်းတို့၊ သတင်းထောက်အသင်းတို့ ပေါ်ထွက်လာဖို့ အရင်ဆုံး လုပ်ရပါမယ်။ ဒါကိုမလုပ်ဘဲနဲ့ သတင်းမီဒီယာ ကျင့်ဝတ်စည်းကမ်းရေးဆွဲတာ ဖြစ်ဖြစ်၊ မီဒီယာဥပဒေ ပြဌာန်းတာဖြစ်ဖြစ်၊ အောင်မြင်လာဖွယ် မရှိပါဘူး။ ဘာကြောင့်လဲဆိုတော့ ဘယ်လိုသတင်းသမားစစ်စစ်မျိုးမှ လက်ခံနိုင်မှာ မဟုတ်လို့ပါ။

လူထုစိန်ဝင်း

(Weekly Eleven Journal အတွက် သတင်းစာဆရာကြီး လူထုစိန်ဝင်း ရေးသားခဲ့ပြီး စာပေစိစစ်ရေးက ဖြုတ်ပယ်ခဲ့သော ဆောင်းပါးဖြစ်ပါသည်။ ဆရာ လူထုစိန်ဝင်းထံ ခွင့်ပြုချက်တောင်းယူပြီး ဖော်ပြပါသည်။)

by Ag Myint Tham face book မှဖေါ်ပြပါသည်။